بسبوسة بالشوكولا والكابريس

المقادير
3بيضات+كاس الا ربع زيت +كاس الا ربع سكر+نصف كاس حليب+3ملاعق كبيرة قهوة ثقيلة +كاس ونصف سميد متوسط يعني لاراهو مسمد ولا راهو خشين كي الدشيشة بمعنى كي تشري السميد استعمليه مباشرة +نصف كاس فرينة وممكن تعوضيه بنواد كوكو ونصيحة اعملوه بالنواد كوك يعطيكم مداق هايل خير من الفرينة+كيس خميرة ونصف+2ملاعق كاكاو

في صحن غامق حطي الزيت والسكر والبيض والقهوة والحليب خلطيهم مليح وزيدي السميد والكاكاو والفرينة والخميرة وقرصة ملح

ادهني لي مول بالزبدة ورشيهم بالفرينة وصبي ملعقة كبيرة في كل مول كيما الصورة

دخليهم لفرن مسخن مسبقا على 180درجة حتى تنشف البسبوسة ويولي لونها غامق من الحواشي

كي تخرجيها مباشرة اسقيها بخليط الكرمال

اللي هو عبارة علىنصف كاس حليب زيديلو 20 حبة كبريس وحطيه على نارهادئة حتى يذوب وزيديلو 3 ملاعق كبيرة قهوة ثقيلة و2 ملاعق كبار عسل ولا ممكن تستعملي النيستلي اللي يتباع في علب تحليه في نصف كاس ماء وتسقي بيه

المهم ان البسبوسة تكون سخونة وخليط الكرمال بارد خليها في ليمول حتى تتشرب مليح انا كان عندي الوقت خليتها الليل كامل وفي الغد كي جاوني الضياف قلبت الحبة وزدت سقيتها شوية برك وحشيت الوسط بلاكرام شانتيي وبرشت فوقها شوكولا سوداء

والله بدون مبالغة طعمها مختلف تماما وروعة وكي تذوقيها اول مرة ماتعرفيش مكوناتها لانها فيها عدة نكهات 
هاذ الكمية تعمل حتى ل 28 حبة بالمول كيما اللي في الصورة

نتمنى تنال اعجابكم حبيباتي ونهديها لكل الامهات اللي عندهم اولادهم يمتحنو ونزيد نقلهم ربي ينجحهم وتفرحو بيهم يارب