faux تيراميسو بالفراز تحلية فاخرة واقتصادية

اليوم جبتلكم تحليةعبارة عنfaux تيراميسو وسميت بهذا الاسم لان تشبه في التيراميسو لكن بمقادير مختلفة راح نعوض جبنة الماسكربون بالياؤؤرت والقهوة بشراب الفراولة ونعوض الكاكاو بالشكولة البيضاء راح نتحصل على تحلية رائعة بدون اطالة نخليكم مع الوصفة

المقادير:
راح نعطيكم مقادير تكفي حوالي 4 اكواب

كمية من بيسكوي بودوار

2 علب ياؤورت ذوق فراولة
4 م ك كريم شانتيي غبرة
كمية من الفراولة
لتحضير شراب الفرولة نحتاج الى

100غ فرولة +م ك سكر رطب


للتزيين

شكولة بيضاء
حبات فراز

الطريقة:

اولا نطلع الكرم شانتيي غبرة مع كمية من الحليب الباااارد انا نضيف الحليب تدريجيا ونخلط بالباتور على اقصى سرعة حتى نتحصل على القوام المطلوب

نضيف 2 علب ياؤورت لكريمة الشانتيي انا استعملت ذوق الفراز ونحرك هنا راني ماضفتش السكر للكريمة لاني ضفتلها الياؤورت ولي يحب الحلاوة بزيادة ممكن يضيف نصف م ك سكر رطب

من جهة نحط 100غ فراز مع م ك سكر رطب في الميكسور راح نتحصل على شراب الفراولة

الان نحضر الاكواب 

نحط كمية قليلة في اسفل الكوب

من بعد نحط البودوار في شراب الفراولة مانخليهش يتشمخ قيس ماندخل في الشراب نعاود نخرجه ونستفو فوق الكريمة

نعاود نحط كمية من الكريمة ونحط فوقها فراز مقطع

ثم نحط طبقة اخرى من البودوار 

واخيرا طبقة من الكريمة

نغطي الاكواب بورق الشفاف ونحطهم في الثلاجة من 3 الى 4 ساعات 

من بعد نزينهم بالشكولة البيضاء المبشورة وحبات من الفراز ونقدم التحلية

بمقادير بسيطة نحضر تحلية لذيذة وفاخرة

عن قرب 

هذا شكلها من الداخل امممممممم

نتمنى تعجبكم التحلية وتجربوها

ولا تنسوني اخواتي من صالح دعائكن ولكن بالمثل

في امان الله