فوري نوار بالايسكريم روووووعة من مطبخ ام اماني

السلام عليكم اخواتي

بما اننا في فصل الصيف ومع ارتفاع درجة الحرارة مايليق غير المثلجات
واليوم جبتلكم طريقة جديدة لتقديمها سهلة والنتيجة رائعة وتحمر الوجه خصوصا قدام الضيوف 

المقادير:

لتحضير البيسكوي نحتاج الى

3بيضات،90غ سكر،60غ فرينة،30غ كاكاو،نصف م ص خميرة كيميائية،فاني

اولا نسخن الفرن على 180درجة
نخلط البيض مع السكر والفاني بالخلاط الكهربائي جيدا من بعد نضيف الفرينة والكاكاو والخميرة لي نكونو غربلناهم من قبل ونحرك غير بالعقل نفرغ الخليط في مول يكون بلاطو صغير عليه ورق الزبدة وندخله يطيب لمدة10د

لما يطيب نخليه يبرد

نكونو حضرنا الايس كريم ذوق فاني وممكن نستعمل الجاهز او اي وصفة حنا معتمدينها
انا حضرت في البيت عملت الايسكريم بالفلان هذا الوصفة لقيتها هنا في هذ االمنتدى طريقة ناجحة وسهلة نشكر صاحبتها
لتحضير هذا الايسكريم نحتاج الى

2علب فلان ذوق فاني+2كيسان حليب باااارد+100غ شانتيي غبرة نخلط جميع المقادير مع بعض بالخلاط الكهربائي حتى نتحصل على ايسكريم نحط في المجمد على الاقل 6ساعات

ناخذ هذا النوع من لي مول يكون سمكهم كبير ونقطع دوائر ممكن نستعمل اشكال اخرى

نحط طبقة من البيسكوي داخل المول الصغير

نخرج الايسكريم من المجمد 5د قبل من بعد نضيفلو كمية من الكرز المقطع

نحط كمية من خليط الايسكريم والكرز داخل المول ونغلق بقطعة اخرى من البيسكوي

وندخله للمجمد لعدة ساعات
عند التقديم ناخذ لي مول لي فيهم المثلجات من الثلاجة وبواسطة قطعة قماش نحطوها في الماء الساخن ونمسح ليمول راح ننزهعهم بسهولة او نخليهم لعدة دقائق راح يتنزعو بسهوله ايضابعدها نزينهم بالكريم شانتي لي نكونو حضرناه قبل وحبات كرز وقطع شكولة لي نكونو ذوبناها قبل وشكلنا بها عدة اشكال
وهذا شكلها النهائي

نتمنى تجربوه ويعجبكم ولاتنسوني من صالح الدعاء ولكن بالمثل
في امان الله 

قلب اللوز باللبن بالشرح والخطوات المصورة

المقادير:

6كيلات دشيشة الخاصة بقلب اللوز
3كيلات سكر
كيلة زيت
كيلة لبن
رشة ملح
فاني
رشة خميرة كيميائية

الشاربات

6كيلات ماء
3 كيلات سكر
قطرات من عصير الليمون
فنجال صغير ماء الزهر


الطريقة:

بالنسبة للكيلة المستعملة تعتمد على الصينية لي راح نطيب فيها قلب اللوز يعني اذا كانت الصينية كبيرة نستعمل كيلة كبيرة واذا صغيرة نستعمل كيلة صغيرة

نكيل الدقيق ونحط في الصينية ونشوف للارتفاع اذا شفناه مرتفع بزاف نقص في الكيلة واذا هابط نستعمل كيلة اكبر

من بعد نحط الدقيق مع السكر والزيت ورشة الملح ورشة الخميرة الكيميائية وشوية فاني

ثم نضيف كيلة من اللبن انا استعملت نتاع القارورة

نخلط المقادير غير بالاصابع راح نتحصل على هذا الخليط

نضيف ماء الزهر غير بالشوية حتى يتكور في يدك يعني كي نحط كمية من الخليط في اليد ونحرك راح تتشكل عندي كويرة هذا يعني ان العجينة مليحة ماتحتاجش ماء زهر اضافي

نغطي الخليط ونخليه يرتاح لمدة نصف ساعة

في هذا الوقت نحضر الشاربات

نحط السكر والماء مع قطرات ليمون على نار متوسطة ونحسب 10د من بداية الغليان ونطفي عليه ونضيف ماء الزهر

من بعد نشعل الفرن من الاسفل على 200د 
ناخذ الصينية وندهنها بالزبدة ونحط الخليط في الصينية بلا مانضغط عليه 
بواسطة ظهر ملعقة نعدله ونسقمه 
ناخذ سكين ونشكل خطوط غير من فوق ونرشق حبات لوز

ندخله للفرن ونخليه حوالي نصف ساعة المهم حتى نشوف الاطراف حمارت هنا نطفي من الاسفل ونشعل من فوق ونخليه حتى يتحمر ملييييح

من بعد نخرجه ونسقيه بالشربات مباشرة وهو سخون على مرة واحدة

نعاود نرجعه للفرن وهو سخون ونغطيه بصينية اخرى ونخلي فتحة حتى مايعرقش 

من الاحسن نخليه يبات من بعد نقطعه لكن مانظنش تصبرو عليه هذا المدة خخخخ اذن على الاقل نخليوه 6 ساعات يتشرب مليح الشاربات وهذا شكله بعد ماطاب

شوفو كيفاه معسل وطري اممممم

نتمنى تجربوه خاصة ان شهر رمضان على الابواب

اللهم بلغنا رمضان

ادخلو شوفو واش عملت بالبيسكوي رولي

السلام عليكم 
كيف حالكن غالياتي ان شاء الله كامل راكم بخير

المقادير:
4بيضات
100غ سكر
75غ فرينة
25غ نشاء
م ص فاني
م ص خميرة كيميائية
الكريم باتسيير:
ل800غ من الكريم باتسيير نحتاج
500مل حليب
100غ سكر
50غ نشا
3صفار بيض
50غ زبدة
فاني
الكريم شانتيي:
100غ كريم شانتيي غبرة
200مل حليب باااااارد
2 م ك سكر رطب
نحتاج ايضا 
الى كمية من العجينة المورقة وممكن نستبدلها برقائق اللوز المحمصة
حبات فراز
الطريقة:
اولا نحضر كريم باتسيير:
نحط الحليب مع السكر فوق النار ونتركه يسخن
من جهة نحرك صفار البيض والفاني والنشا بالفووي نحط على الخليط كمية من الحليب الساخن ونحرك ونصب الخليط على باقي الحليب ونحرك حتى تعقد ننزعها من النار ونضيفلها50غ زبدة نحرك ونغطيها ونخليها تبرد

نبدأ في تحضير البيسكوي
اولا نشعل الفرن على 180درجة
نفصل البياض على الصفار
نطلع البياض مع رشة ملح كالثلج ونخليه جانبا
نخلط صفار البيض مع السكر والفاني حتى يبياض الخليط نضيف الفرينة والنشاء والخميرة لي نكونو غربلناهم مرتين ونحرك ثم نضيف بياض البيض ونحرك بالعقل من فوق لتحت 
نفرش بلاطو بورق الزبدة ونحط الخليط انا استعملت بلطو بقياس27على30سم
ندخلة للفرن لمدة10د لا اكثر لان اذا تحمر من الاسفل بزاف كي تجي تروليه يتقطع

بعد ما نحطو يطيب نحضر سربيتة تكون نظيفة ومشمخة شوية نحطها ونحط فوقها ورق الزبدة 
بعد مايطيب البيسكوي ونقلبه فوقهم وننزع ورق الزبدة لي كنا طيبناه فوقو

ونروليه وهو سخون كيما تلاحظو انا روليتو بالعرض لي حابة الحبة تجيها صغيرة تروليه بالطول

نغطيه بورق الزبدة والسربيتة ونخليه لمدة10د

بعدها نفتح ونحط داخله كمية من الكريم باتسيير

ونسطها على سطح البيسكوي ونعاود نروليه

في هذا الوقت نحضر كريم شانتيي
نخلط المقادير السابقة مع بعض ونطلعها بالباتور حتى نتحصل على كريمة 
نغطي بها كامل البيسكوي رولي ونغطي الكريمة بالعجينة المورقة لي نكون بسطتها وطيبتها في الفرن حتى تتحمر من بعد نفتتها ونزين بها 

نقطع البيسكوي رولي الى دوائر بسمك 2 ونصف سم

ندهن من فوق كل حبة بشوية كريم شانتيي ونحط حبة فراز في المنتصف ونزين الجوانب بالكريمة وهذا شكله النهائي

عن قرب اممممم

نتمنى يعجبكم القاطو وتجربوه 
في امان الله 

لكل المناسبات السعيدة حلوى2014 بالخطوات المصورة حصريا من مطبخ ام اماني

بسم الله الرحمان الرحيم



كيف حالكن غالياتي ان شاء الله الكل بصحة وعافية.

بما اننا في موسم الاعراس والمناسبات جبتلكم حلوى جديدة هاااايلة تشد اليد لازمها خاطر طويل لكنها تستاهل لان شكلها رااائع وفكرة تشكيلها جديدة على الحلويات الاخرى.

بدون اطالة نخليكم مع الوصفة بالخطوات المصورة

العجينة:

3كيلات فرينة
نصف كيلة زبدة توريق ذايبة وباردة
م ك فاني
رشة ملح
ملون ابيض نتاع الميزان
ماء الزهر

الحشو:

3كيلات لوز مرحي رقيق
كيلة ناقصة شوية سكر
بيض
قشور ليمون
ملون وردي

للتزيين:

عجينة اللوز الاصطناعية
ملون وردي واخضر
لماع فضي
للتعسيل:
كيلة شربات سبق وحطيت طريقتها في مواضيع سابقة
كيلة عسل اصطناعي

الطريقة:


اولا نحضر العجينة

نحضر العجينة
نخلط الفرينة مع زبدة التوريق ورشة الملح والملون الابيض والفاني ونحكها مليح من بعد نفوتها في سيار يكون رقيق حتى نتفادى ظهور حبيبات فيها ونلمها بماء الزهرنضيف بالشوية حتى نتحصل على عجينة متماسكة لازم تكون شادة روحها حتى يسهل تشكيلها نغلفها بورق الشفاف ونخليها ترتاح.
من جهة نحضر الحشو

نخلط اللوز مع السكر والواست والفاني ونلم بالبيض حتى نتحصل على عجينة متماسكة نعجنها شوية حتى يذوب السكر نغطي الحشو بورق الشفاف ونخليه يرتاح على الاقل 3 ساعات.

نقسم العجينة على اثنان

القسم الاول نعمل به مستطيلات

نرقق العجينة شوية بالحلال من بعد نفوتها في الماشينة حتى الرقم 7 يعني لازم تكون رقيقة لان راح نروليها باه كي نطيبها ماتبقاش معجنة

من بعد نقطع مستطيلات 12على 4سم
من جهة نوزن الحشو 25غ و نبسط الحشو على ورق الزبدة بنفس القياس يعني 12على 4سم

ندهن العجينة ببياض البيض ونحط الحشو من فوق

نروليها بالطول

ونكمل نفس العملية مع باقي الحشو 

الان نكمل تزيين الحلوى بالقسم الثاني من العجينة

نحتاج الى مول السليكون نتاع المادلان الحجم الصغير

نبسط العجينة بالحلال ثم نفوتها في الماشينة حتى الرقم 6 مالازمش تكون رقيقة بزاااف حتى نقدر نشكلها

بواسطة مول دائري قطره من 7الى 8سم نقطع دوائر

بالفرشاة نحط فوقهم الناكري الفضي

ونحط الدائرة داخل مول المادلان على الجهة لي فيها الملمع

ونحط داخلها مول اخر ونضغط مليح حتى تصبح مشرشفة يعني بليسي

الان بواسطة مول صغير او بوشون نتاع قارورة نقطع دائرة صغيرة في القاعدة نتاع العجينة لي حطيناها في المول حتى ندخل المستطيل لي حضرناه في المرحلة1 ونلصق ببياض البيض

الصورة توضح اكثر

نفس الخطوة نعملها من الجهة المقابلة من المستطيل يعني لكل مستطيل نحتاج زوج دوائر حتى نتحصل على هذا الشكل

بعد مانكمل كامل الحلوى نحطها في صينية بها ورق زبدة ونخليها ترتاح ليلة كاملة ضروري ترتاح حتى تبقى محافظة على شكلها

بعدها نطيبها على 150د لازم تبقى محافظة على لونها الابيض

نعسلها في خليط الشاربات والعسل الاصطناعي يكون دافيء ونحطها تقطر على مشبك

بعدها نزينها بعجينة اللوز في المنتصف حتى نغطي الفراغ الموجود في المنتصف وايضا راح نضيف للحلوى جمالية اكثر ونرشها بشوية ملمع فضي من بعد نحطها في ليكيسات ونقدمها

وهذا شكلها النهائي

شكلها من الداخل

صراحة رووووعة

ان شاء الله تعجبكم الحلوى وتجربوها في افراحكم ومناسباتكم السعيدة ربي يدوم الفرحة في بيوتكم

ولا تنسونها اخواتي من صالح الدعائكم 

في امان الله