صابلي بذوق البرتقال

المقادير على بركة الله 

250غ مرغرين طرية و نصف كاس زيت و نصف كاس سكر ناعم و نصف كاس مايزينة وربع كاس عصيرالبرتقال و قشور حبة برتقال و نصف خمارة 

و ملون برتقالي و الفرينة حتى تتلم العجينة


الكريمة 
125 غ مرغرين طرية و 50 غ سكر ناعم و ربع كاس عسيلة و 50غ شانتيي غبرة و كاس شاي عصير البرتقال و قشور البرتقال

الطلية
عصير البرتقال مصفى و سكر ناعم مغربل و ملون برتقالي 


التحضييييييييييييييييييير

الكريمة 
بالباتور نضرب المرغرين و السكر و عصير البرتقال و القشور و العسل و نطلع مليح ثم نزيد الشانتيي بودرة حتى تطلع مليح و نخليها في الثلاجة حتى لوقت 

الاستعمال ضروووووووووري جدا

العجينة 

نضرب المرغرين و السكر و الزيت و الملون البرتقالي و نخدم جيدا بالباتور او بكف اليد ونزيد عصير البرتقال و المايزينة و نصف خمارة و نلم 

بالفرينة و اللون البرتقالي لازم يكون فاتح و نحل العجينة بالحلال رقيقة كل واحدة و الشكل اللي تحبو انا خيرت القلب نطيبها كيما الصابلي عادي و 

نخليه يبرد بعدها نجبد الكريمة و نلصق 2 حبات مع بعض تخرجلك حوالي 40 حبة متلاصقة 

شوفففففففففو الطبقات امممممممممممممممممممممم

وهذا المول اللي زينت بيه

نصائئئئئئح مهمة :


اولا العجيييييينة لازم نحلها شويا رقيقة حوالي نصف سم على الاكثثثثر ونحله على نايلون باش يساعدنا وتحافظ على شكلها 

ثانيا الفرن نشعللها من تحت ونطلع الصينية للفوق يعني تطييب كيما قاع لي صابلي واذا شفنا طابت ومن تحت واحتجنا نشعله من فوق نشعله لدقائق قليلة فقط يطيب ولكن يجب ان لا يتغير لونه 



هذه الكمية قطعتلي حوالي 40 حبة متلاصقة ولكن السمك درته رقيق يعني كل وحدة حسب السمك اللي تحل بيه 

الكريمة الكمية اللي مديتها دراتلي نصف الكمية لان نحب الكريمة طبقة باينة لكن انتم كل وحدة والذوق تاعها اذا تحبي الكريمة كيما انا ضاعفي الكمية تاعها 

او ديري نصف الكمية العجينة ومع كمية الكريمة هاذي راهي تجييييك في علبة 250غ في زوج 

حبيباتي الصابلي هش جدا راه يتكسر معاكم يعني لازم نلصق بلطف يعني ديروا الكريمة كا مل على سطح الحبة الوحدة ثم حطي اختاها فوقها بمعنى انك ما تحطيش الكريمة في الوسط وتقولي نضغط عليها رايحة تخرج في الجوانب راهي هشة وتتكسر معاك 


والطلاء حبيباتي العصير تاعه يكون مصفى عكس الكريمة والعجينة 

والطلاء يكون خفيف شويا على الطلاء العادي تاع المخبببز او التشاراك او........ يعني ثقيل لكن سائل نوعا ما 


وما نغطسش الحبة في الطلاء بل نحطها على شباك تحته سنيوة صغيرة ونفرغ الطلاء على الحبة بالمغرف وهي فوق الشباك واللي يقطر نعاود نستعمله عاديييييي 


ونتركها تجف تماما ثم نحي بقايا الطلاء من تحت برفق بالسكيييين يعني نكرطها راهي هشة ههههههههه باش يجي الشكل متحوف ثم نزين بالوردة والطلاء اللو ن المغاير حسب الصورة او حسب الرغبة 



نتمنى نكون قدمت كل النصائح الهامة واي سؤال انا في الخدمة


وهذا هو راه نفس الصابلي لكن بالليمون مزين بزهرة التوليب